Фарғона вилояти божхона бошқармаси ходимлари ҳам вилоятнинг Олтиариқ тумани “Қизил тепа” маҳалла фуқаролар йиғини ҳудудида олиб борилаётган ободонлаштириш ишларида фаол қатнашмоқда.

Мазкур ҳудудда 4 та соғломлаштириш санаторийлари ва кўплаб савдо ҳамда маиший хизмат кўрсатиш шаҳобчалари мавжуд. Санаторийларга республикамизнинг турли вилоятларидан меҳмонлар ҳамда хориждан ҳам кўплаб туристлар ташриф буюради.

“Қизил тепа” маҳалла фуқаролар йиғини ҳудудида аҳоли вакиллари билан бир сафда божхона ходимлари ҳам бир неча кун давомида ҳудуднинг асосий кўчалари бўлган "Қизилтепа", “Сиҳатгоҳ”, “Янгиобод”, “Ёшлар” ва “Ўзбекистон” кўчаларини тартибга келтиришди. Ариқлардаги ортиқча ахлатлар ва кўчаларнинг йўл бўйларида ўсиб ётган бегона ўтлардан тозаланди. Махсус техника воситалари ёрдамида маҳалланинг кўчаларини текислаш ва шағаллаштириш ишлари олиб борилди.

Бундан ташқари  “Ёшлар” кўчасининг йўллари таъмирланди. Асосий учта катта кўчаларнинг йўл бўйидаги тўпланиб турган тупроқ ва шағаллар текисланиб, тартибли кўринишга келтирилди.

"Қизилтепа" кўчасидаги кўп қаватли уйларнинг ён атрофи, томорқа ерлари бегона ўт ва тиканлардан тўлиқ тозаланиб, бир неча ойдан буён тўпланиб турган ахлатлар олдириб ташланди.

"Қизилтепа" МФЙга кириш қисмида жойлашган савдо ва маиший хизмат кўрсатиш масканлари замонавий кўринишга келтирилиб қайта таъмирланди ва у ердаги дарахтларга шакл берилди.

Бундай ободонлаштириш ишлари вилоятнинг барча ҳудудларида олиб борилмоқда.