Яқинда Тошкент шаҳар божхона бошқармасининг Контрабанда ва божхона қонунчилиги бузилишига қарши курашиш бўлими ходимлари ҳуқуқни муҳофаза қилувчи бошқа идора вакиллари билан ҳамкорликда  катта миқдордаги товар-моддий бойликларнинг ноқонуний айланмасини фош қилишди.

Пойтахтимизда ўтказилган тезкор тадбир давомида, фуқаролар И.М. ва М.Х.га тегишли иккита “Isuzu”  русумли автомашиналар тўхтатилиб, автомашина юкхоналари белгиланган тартибда кўздан кечирилди.

Натижада, автомашина юкхонасида божхона расмийлаштирувидан ўтказилганлигини тасдиқловчи ҳужжатлари бўлмаган, хорижда ишлаб чиқарилган умумий қиймати 357 миллион сўмлик 30 дона телевизорлар, қарийб 12 минг дона сақичлар, салкам 3000 дона сифати кафолатланмаган тиббий воситалар ва бошқа товар-моддий бойликлари уддабуронлик билан яширилганлиги маълум бўлди.

Ҳозирда юқоридаги ҳолатлар юзасидан божхона органлари томонидан суриштирув ҳаракатлари давом эттирилмоқда.