Жумладан қўшни давлатдан ўзининг бошқарувидаги “Форд-Транзит” русумли автомобилида кириб келган фуқаро И.У. томонидан “Даут-ата” чегара божхона пости ходимларини чалғитиш учун қўлланилган навбатдаги “найранги” амалга ошмади. Ушбу фуқаро томонидан божхона назоратидан яширилган ва оғзаки сўров давомида маълум қилинмаган 2 хил турдаги жами оғирлиги 10,82 кг. бўлган 26 дона пиротехника воситалари ашёвий далил сифатида олиб қўйилди.

Бу борада, юртимиз фуқароси М.У.нинг ҳам “омади чопмади”. Яъни у ўзига тегишли бўлган “Ласетти” русумли автомобилида божхона назоратидан яширинча олиб кираётган 2 хил турдаги оғирлиги 2 кг. бўлган пиротехника воситалари пост ходимлари томонидан фош этилди.

“Лада Ларгус”да кириб келган яна бир фуқаро Р.М. томонидан амалдаги тартиб-таомилларга риоя этмасдан божхона ходимларини алдаб, 4 дона умумий оғирлиги 1,15 кг бўлган пиротехника воситаларини Ўзбекистон ҳудудига олиб кирмоқчи бўлган вақтда тўхтатиб қолинган бўлса, фуқаро Қ.О.нинг “CAPTIVA” русумли автомобилида аниқланган оғирлиги 8 кг. бўлган пиротехника воситалари ҳамда “Қорақалпоғистон” темир йўл чегара божхона пости орқали ҳаракатланган “Саратов-Ташкент” йўналишидаги йўловчи поезди йўловчиси фуқаро Э.Р.нинг қўл сумкасига яширилган пиротехника воситалари ҳам божхоначилар эътиборидан четда қолмади.

Божхона назорати давомида жами оғирлиги 22 кг.дан ортиқ бўлган 7 хил турдаги пиротехника воситалари ҳуқуқбузарлик ашёси сифатида олиб қўйилди.

Ҳозирда ушбу ҳолатлар юзасидан божхона текширувлари давом эттирилмоқда.