Аммо сифати кафолатланмаган, инсон руҳиятига кучли таъсир кўрсатувчи, шифокор рецептисиз берилмайдиган дори-дармон воситаларини ноқонуний равишда сотаётган айрим кимсаларни юртдошларимизнинг саломатлигидан кўра, мўмай даромад кўпроқ қизиқтиради.

Яқинда Тошкент шаҳар божхона бошқармасининг Контрабанда ва божхона қонунчилиги бузилишига қарши курашиш бўлими ходимлари ҳуқуқни муҳофаза қилувчи бошқа идоралар билан ҳамкорликда Тошкент шаҳар Яккасарой туманида тезкор тадбир ўтказди.

Тадбир давомида фуқаро Д.У. тўхтатилиб, белгиланган тартибда кўздан кечирилганда унинг ёнидан иккита конвалютада жами 20 дона “Трамадол 50 мг. Ланнахер” номли таблетка кўринишидаги гиёҳвандлик воситасига ўхшаш моддалар борлиги аниқланиб, ашёвий далил сифатида олиб қўйилди.

Ҳозирда мазкур ҳолат юзасидан текширув ҳаракатлари давом эттирилмоқда.