Тошкент вилояти божхона бошқармаси Контрабанда ва божхона қонунчилигига бузилишига қарши курашиш бўлими ходимлари “Ғишткўприк” чегара-божхона постида ондатра териларини ноқонуний равишда олиб чиқишга уринган шахснинг фаолиятига чек қўйишди.
Қўшни давлатга йўл олган Д.М. нинг қўл юклари холислар иштирокида кўздан кечирилганида, ушбу йўловчи божхона декларациясида ҳам, божхона ходимларининг оғзаки сўрови пайтида ҳам маълум қилмасдан туриб, қиймати 29 млн. сўмдан ортиқ бўлган 735 дона ондатра териларини яширин равишда олиб чиқишга урингани аниқланди.
“Навоий” чегара божхона постида эса қўшни давлатдан кириб келаётган фуқаролар П.М. ва Г.У. 2 дона чангютгичларни олиб киришаётган вақтида тўхтатиб қолинди. Гарчи, 1 дона чангютгични олиб киришга амалда тартибларга кўра рухсат этилган бўлса-да, пиёда равишда кириб келганда шахсий фойдаланиш учун кўзланган ва божсиз олиб киришга рухсат этилган товарларнинг умумий қиймати 300 АҚШ долларидан ошмаслиги кераклигини унутмаслик керак. Вахоланки, ушбу чангютгичларнинг ҳар бирининг бозор қиймати ўртача 2 минг АҚШ долларини ташкил қилар экан.
Ҳозирда ушбу ҳолатлар юзасидан божхона текширувлари давом эттирилмоқда.
Тошкент вилояти
божхона бошқармаси
Ахборот хизмати
7.12.2018