Машғулотлар жорий йилнинг 17 февраль куни Президентимиз Шавкат Мирзиёев ҳузурида ўтказилган видеоселектор йиғилишида божхона тизимида кадрлар тайёрлаш ва малакасини ошириш бўйича ишларни кучайтириш юзасидан берилган топшириқлар ижроси доирасида ташкил қилинди.

Контрабандага қарши курашиш, товарларни ТИФ ТН бўйича таснифлаш, божхона расмийлаштируви жараёнида статистик қийматни белгилаш ҳамда Божхона кодексига киритилган қўшимча ва ўзгартиришлар мавзуларида Божхона институтининг Қайта тайёрлаш ва малака ошириш факультети бошлиғи, доцент М.Дўстов, катта ўқувчилар М.Мирсагатов, А.Сагитов, Ш.Лутфуллаевлар дарс ўтишди.

Ўқув дарси давомида божхона постларида божхона назорати ва расмийлаштирув жараёнида юзага келаётган хато ва камчиликлар, амалиётга жорий этилиши кутилаётган меъёрий ҳужжатлар ва уларнинг афзалликлари юзасидан тушунчалар берилиб, ходимларни қизиқтирган масалалар юзасидан берилган саволларига жавоб қайтарилди.

Тизим самарадорлигини янада ошириш борасида божхона пости ходимларининг фикр-мулоҳаза ва таклифлари тингланди.

Сайёр ўқув машғулотлари давом этмоқда.