Айни дамда экспортёр корхоналарнинг товарларини хорижий бозорларига тез ва сифатли тарзда етказиб берилишини таъминлаш ҳамда тадбиркорларнинг экспорт борасидаги билим ва тажрибаларини янада ошириш мақсадида Бухоро вилояти божхона бошқарма бошлиғи ўринбосари И.Сейдеметов бошчилигида “Бухоро Файз Текстил” ва “Кумушкент Текс” масъулияти чекланган жамиятларида сайёр учрашувлар ташкил этилди.

Ўтказилган учрашувларда ишлаб чиқарилаётган ярим тайёр маҳсулотларнинг асосий қисми Россия, Белоруссия, Хитой ва Туркия давлатларига экспортга йўналтирилаётганлиги таъкидланди.  Шунингдек, яқин келажакда эса, энг илғор ва замонавий ресурс тежамкор технологиялар билан жиҳозланган жамиятда тайёр маҳсулот ишлаб чиқариш режалаштирилгани таъкидлаб ўтилди.

Бугунги кунда вилоят божхона бошқармаси мутасадди ходимлари, тадбиркорларга фаолият турларини янада кенгайтириш учун зарур техник ускуна ва жиҳозларни импорт товар кўринишида келтириш ҳамда маҳсулот экспорти бўйича амалий ёрдам кўрсатиб келмоқда.

Албатта, бу каби ўзаро ва яқин ҳамкорликдан кўзланган асосий мақсад, экспортёр корхона раҳбарларининг тегишли муаммоларни ўрганиш, уларни маҳсулот экспорти борасидаги янгиликлар билан таништириб бориш, пировардида эса, мамлакатимизнинг экспорт салоҳиятини оширишдан иборатдир.