Иккала мамлакат ўртасида ўзаро борди-келдилар ва ташқи савдо айланмаси тобора кенгаймоқда. Бу эса иккала мамлакат божхона хизматлари ўртасидаги ҳамкорликни ҳам янада мустаҳкамлашни тақозо этади.

Гиёҳвандлик воситаларининг ноқонуний айланмаси ва божхона қонунбузилиши ҳолатларига қарши курашишдаги ҳамкорлик минтақа хусусиятидан келиб чиқилса, жуда ҳам долзарб! Айниқса, афғон наркотикларини Тожикистон орқали республикамизга кириб келишининг олдини олиш иккала мамлакат божхона хизматларининг биргаликдаги саъй-ҳаракатларига чамбарчас боғлиқ.

Шу мақсадда яқинда Давлат божхона қўмитаси Раиси Акмалхўжа Мавлонов Тожикистон Республикасининг Ўзбекистондаги Фавқулодда ва Мухтор элчиси Абдужаббор Раҳмонзода билан ўтказган учрашувида  наркотик моддаларни излаб топишга ўргатилган 10 бош хизмат итини Тожикистон божхона хизматига беғараз тақдим этиш ташаббусини илгари сурган эди.

Ўз ўрнида мазкур ташаббус Тожикистон томонидан мамнуният билан қарши олинди.

Куни кеча Тошкент вилояти божхона бошқармасининг “Ойбек” чегара –божхона постида ушбу хизмат итларини топшириш маросими бўлиб ўтди.

Дастлаб иккала мамлакат божхона хизмати раҳбарлари ўринбосарлари иштирокида икки томонлама учрашув бўлиб ўтди. Унда томонлар ўзаро ҳамкорликнинг муҳим йўналишлари бўйича фикр алмашдилар.

Шундан сўнг божхона пости ҳовлисида хизмат итларининг қисқа кўргазмали намойиши бўлиб ўтди ва итлар тожикистонлик божхоначиларга топширилди.

Мазкур хизмат итлари Давлат божхона қўмитасининг Миллий кинология марказида “Гиёҳвандлик воситаларини қидириш” йўналишида тайёрланган.

Садоқат рамзи бўлган хизмат итларининг ўз эгаларидан бошқа қўлга ўтиши бироз ҳаяжонли кечди. Лекин, улар тез орада янги муҳитга мослашиб, хизматда юқори кўрсаткичларни қайд этишларига ишонамиз.