Бунда ташкилот Бош котиби Кунио Микурианинг 2021 йил ноябрь ойида мамлакатимизга ташрифи доирасида эришилган келишувлар муҳим аҳамият касб этмоқда.
Ўзбекистон ва Жаҳон божхона ташкилоти ўртасидаги амалий шерикликни кенгайтириш бўйича янги “йўл харитаси” ижроси доирасида кинология соҳасида ҳам ҳалқаро ҳамкорлик тобора кенгаймоқда.

Тошкент халқаро аэропортига Истанбул-Тошкент рейси билан 3 бош бельгия овчаркаси ва 2 бош немис овчаркаси олиб келинди. Мазкур итлар Нидерландиянинг Police Dogs Centre ташкилоти томонидан Миллий кинология марказига беғараз тарзда тақдим қилинди.

Таъкидлаш жоизки, мазкур лойиҳа Бирлашган миллатлар ташкилотининг гиёҳванд моддалар устидан назорат қилиш ва жиноятларнинг олдини олиш бошқармасининг Марказий Осиёдаги минтақавий ваколатхонаси томонидан амалга оширилди.

Лойиҳа доирасида Бирлашган миллатлар ташкилотининг гиёҳванд моддалар устидан назорат қилиш ва жиноятларнинг олдини олиш бошқармасининг ҳалқаро координатори Кеннет Уильямсон, Police Dogs Centre ташкилоти инструкторлари Эрнандес Джонатан ва Ван ден Арнольдуслар Миллий кинология марказида бўлишди.

Дастлаб меҳмонлар марказ фаолияти билан яқиндан танишишди. Таъкидлаш жоизки, Миллий кинология маркази Жаҳон божхона ташкилотининг минтақавий мақомига эга ҳисобланади.

Марказда малакали кинологлар ва гиёҳвандлик воситалари, қурол-яроғ, ўқдори, портловчи моддалар, валюта қимматликлари, тамаки маҳсулотларни қидириш каби қатор йўналишлар хизмат итлари тайёрланади.

Ҳозирда Голландиядан келтирилган 5 бош хизмат итлари махсус питомникларга жойлаштирилди. Белгиланган карантин муддати ва иқлимга мослашиш жараёнлари якунига етгач, ҳадемай ушбу итлар Афғонистон ва Тожикистон билан чегарада жойлашган божхона постларида хизматга сафарбар қилинади.