Наманган вилояти божхона бошқармасининг Контрабандага қарши курашиш ва божхона аудити бўлими ходимлари Давлат хавфсизлик хизмати Чегара қўшинлари ҳарбий хизматчилари билан ҳамкорликда Поп туманида тезкор тадбир ўтказишди.

Тадбир давомида “Наманган-Тошкент” йўналишида ҳаракатланаётган фуқаро Ж.К. бошқарувидаги “Мерседес-Бенц” русумли автомашина тўхтатилиб белгиланган тартибда кўздан кечирилди.

Натижада, ушбу автомашинанинг юкхонасида, тегишли ҳужжатлари бўлмаган, хорижда ишлаб чиқарилган 225 миллион сўмлик 15 000 қути  Ўзбекистон Республикаси акциз маркасига эга бўлмаган тамаки маҳсулотлари борлиги маълум бўлди.

Ҳозирда мазкур ҳолат юзасидан божхона органлари томонидан суриштирув ҳаракатлари олиб борилмоқда.