Божхона чегаралари орқали ҳаракатланаётган фуқаролар яратилаётган қулайликлардан самарали фойдаланиш ўрнига, ўз манфаатларини кўзлаб, қонунбузарликларга қўл уришаётгани ҳам учраб турибди.

Айрим турдаги товарларни божсиз олиб киришнинг чекланган меъёрларига кўра, жисмоний шахсларга  атир ва атирсимон суюқликлардан 3 донагача олиб киришга рухсат этилади.

“Урганч аэропорти” чегара божхона постида “яшил йўлак” орқали ҳаракатланган фуқаро С.Б.нинг қўл юклари божхона назоратидан ўтказилганда, унда йўловчи божхона декларациясида қайд этилмаган, белгиланган меъёрдан ортиқча, хорижда ишлаб чиқарилган 12 дона парфюмерия воситалари, яъни атирларни ноқонуний равишда олиб кираётганлиги аниқланди.

Яна бир қоидабузарлик ҳолати бўйича хорижий рейс билан учиб келган фуқаро М.Р  ўзининг ноодатий ҳатти-ҳаракатлари билан  божхоначилар эътиборини тортди.

Шу боисдан ўтказилган божхона кўриги давомида унинг қўл юклари орасида белгиланган меъёрдан ортиқча бўлган 16 турдаги 21 дона парфюмерия маҳсулотлари (атир) борлиги аниқланди.

Ҳозирда мазкур ҳолатлар бўйича текширув ҳаракатлари олиб борилмоқда.