Куни кеча Бухоро вилояти божхона бошқармаси Контрабандага қарши курашиш ва божхона аудити бўлими ходимлари томонидан ҳуқуқни муҳофаза қилувчи бошқа идора вакиллари билан ҳамкорликда Бухоро туманида тезкор тадбир ўтказилди.

Тадбир давомида фуқаро Т.Ж. 1 дона “микки маус” ёзувли қутига солинган пиротехника воситаларини сотиш мақсадида олиб келаётган вақтида тадбир иштирокчилари томонидан тўхтатиб қолинди.

Шундан сўнг фуқаро Т.Ж.нинг яшаш хонадони кўздан кечирилганида, ушбу шахс ўз хонадонида умумий қиймати 23 млн. сўмлик, 59 400 дона пиротехника воситаларини ноқонуний равишда сақлаётгани аниқланди.

Ўтказилган яна бир тадбирда, фуқаро Қ.Ж. шартли харидорга жами  7 млн. сўмлик 18 000 дона пиротехника  воситаларини сотмоқчи бўлган вақтда тадбир иштирокчилари томонидан қўлга олинди.

Ҳозирда мазкур ҳолатлар юзасидан божхона органлари томонидан суриштирув ишлари олиб борилмоқда.

Таъкидлаш жоизки, Ўзбекистон Республикаси Маъмурий жавобгарлик тўғрисидаги кодексининг 185¹-моддасида ҳамда Жиноят кодексининг 250¹-моддасида пиротехника буюмларининг қонунга хилоф муомаласи учун жавобгарлик ва жазо чоралари белгиланган.