Коррупцияга қарши кураш дунё миқёсида бугунги куннинг энг долзарб масалаларидан бири бўлиб қолмоқда. Бу иллатга қарши кураш дунёнинг кўплаб мамлакатларини қамраб олмоқда. Шу қаторда Ўзбекистон Республикаси ҳам коррупцияга қарши курашда ўз ҳиссасини қўшиб келмоқда.

Коррупция шундай иллатки, уни бир ёки икки идоранинг саъй-ҳаракати билан йўқ қилиб бўлмайди. Қачонки, барча фуқароларимиз, жамият унга қарши биргаликда курашиб, унинг илдизларини йўқ қилишга киришилсагина ижобий натижага эришиш мумкин.

Қонун ҳужжатларда коррупция тушунчасига шундай таъриф берилган: “Коррупция – давлат органлари ходимлари моддий ёки мулкий йўсинда, ғайриқонуний шахсий наф кўриш мақсадида, ўз хизмат мавқеидан фойдаланишида ифодаланадиган ижтимоий ҳодисадир”.

Ана шундай ҳодисаларнинг олдини олиш ва унга қарши курашиш, давлат ва жамият қурилишининг барча соҳаларида коррупциоген омилларга чек қўйишга қаратилган қатор ислоҳотлар изчил амалга оширилиб келинмоқда.

Жумладан, коррупциянинг олдини олиш ва унга қатъий қарши курашиш ва давлат органлари зиммасидаги вазифа ва функцияларни бажаришда юзага келадиган коррупцияга оид хавф-хатарларни баҳолаш тизимини такомиллаштириш ҳамда давлат хизматига ҳалоллик стандартларини жорий этиш бўйича бир қанча норматив-ҳуқуқий ҳужжатлар қабул қилиниб, амалиётда ўз ижобий натижасини кўрсатмоқда.

Мамлакатда бюрократик тўсиқларни бартараф этиш ва “яширин иқтисодиёт”ни қисқартириш чоралари кўрилмоқда ҳамда “Коррупциясиз соҳа” лойиҳалари амалга оширилмоқда.

Шу қаторда, Давлат божхона хизмати органларида ҳам коррупцияга қарши курашиш йўналишида тизимли ишлар амалга оширилиб келинмоқда.

Хусусан, Қорақалпоғистон Республикаси божхона бошқармаси томонидан Прокуратура, ДХХ ва бошқа ҳуқуқни муҳофаза қилувчи органлар ҳамда нодавлат ва нотижорат ташкилотлар билан ҳамкорликда 2021 йил январь-сентябрь ойлари давомида жами 42 маротаба шахсий таркиб орасида хизмат интизомини мустаҳкамлаш ва жиноятчиликни олдини олиш, порахўрлик, тамагирлик иллатларининг келиб чиқиши олдини олиш бўйича бошқарма ходимлари ва уларнинг оила-аъзолари иштирокида профилактик йиғилишлар ўтказилди.

Божхона ходимларининг ҳалол, масъулиятли, ўз хизмат вазифаларига сидқидилдан ёндашиши ва адолатли бўлишлари юзасидан доимий равишда тарғибот ташвиқот ишлари олиб борилиши йўлга қўйилган бўлиб, профилактика мақсадида ички хавфсизликни таъминлаш, коррупция ва бошқа ножўя хатти-ҳаракатларнинг олдини олиш бўйича жами 15 маротаба шахсий таркиб эътиборига Шахсий хавфсизлик бўлими томонидан тайёрланган маърузалар ўқиб эшиттирилди.

Шунингдек, ушбу йўналишда 3 маротаба божхона ходимларининг яқин қариндошлари билан учрашувлар ташкил этилди.

Бундай тадбирларни амалга оширишдан кўзланган асосий мақсад ҳам божхона органларининг коррупцияга қарши курашишда қатъий позициясини белгилаш ва тизимда коррупция, тамагирлик ҳолатларига чек қўйган ҳолда ходимларнинг ҳалол ва шаффоф хизмат қилишлари учун имконият ва шароитлар яратишдан иборат.

Шу билан бирга, коррупцияга қарши курашиш самарадорлигини тубдан оширишда фуқаролик жамияти институтлари ва нодавлат секторнинг бошқа вакилларини ҳам кенг жалб этиб қоламиз ҳамда барча жисмоний ва юридик шахсларга ўзларининг божхона соҳасига оид саволлари ҳамда мурожаатларини Давлат божхона қўмитасининг қисқа 11-08 ёки Қорақалпоғистон Республикаси божхона бошқармасидаги (61)224-90-86 ишонч рақамларига қўнғироқ қилиб йўллашлари мумкинлигини эслатиб ўтамиз.