Мазкур йўналишдаги навбатдаги учрашув Шаҳрисабз шаҳрида жойлашган Шаҳрисабз текстил корхонасида бўлиб ўтди.

Умумий қиймати 15 миллион евролик ушбу лойиҳа фойдаланишга топширилганига ҳали кўп вақт бўлмади. Корхона калава ип ва мато маҳсулотлари ишлаб чиқаришга мўлжалланган. Йилига 7,5 минг тонна ип калава ва мато ишлаб чиқариш қувватига эга. Ишлаб чиқариш жараёни учун Германия ва Япония давлатларидан энг замонавий ип йигирув ва тўқув дастгоҳлари олиб келиниб ўрнатилган.

Корхонада хорижлик ҳамкорлар талаби асосида ҳам маҳсулотлар ишлаб чиқарилмоқда. Бу борада, пахта толасини аналоги бўлган сунъий толалар четдан импорт асосида олиб келиниб, шундан ип ва мато ишлаб чиқарилмоқда ҳамда четга экспорт қилинмоқда. Корхонада бир ойда 600 тонна маҳсулот ишлаб чиқарилмоқда.

Бу ерда ишлаб чиқарилаётган маҳсулотлар жаҳон стандартларига тўла мос келганлиги сабабли, буюртмачилар сони ҳам кун сайин ортиб бормоқда. Жорий йилнинг ўтган даври мобайнида 2,3 миллион АҚШ долларилик ип ва мато Туркия, Россия, Белорус ва Ҳиндистон давлатларига экспорт қилинди.

Шунингдек, маҳаллий ёш мутахассисларга замонавий технологиялардан фойдаланиш сир-асрорларини ўргатиб бориш учун Туркия ва Ҳиндистон давлатларидан малакали мутахассислар жалб қилинган.

Айни кунда корхона мутасаддилари томонидан пахта хом ашёсини етиштиришдан тортиб қайта ишлаш, ип калава ишлаб чиқариш, тўқиш, ранглаш, тайёр маҳсулот ишлаб чиқаришга қадар жараёнларни қамраб олган йирик лойиҳаларни амалиётга жорий этиш бўйича ишлар олиб борилмоқда.