Аммо, тизимда ўзига хос, республикамизда ягона бўлган “Чет эл ваколатхоналари” ташқи иқтисодий фаолият божхона пости ҳам мавжуд.

Божхона постида чет давлатларнинг Ўзбекистон Республикасидаги дипломатик ваколатхоналари, Бош консулликлар, Савдо ваколатхоналари, Халқаро ташкилотлар ваколатхоналари ва Халқаро ҳукуматлараро ва хорижий давлатларнинг ҳукумат ташкилотлари ваколатхоналари расмий фойдаланиши учун мўлжалланган товар ва транспорт воситалари, шунингдек божхона постида мамлакатимизнинг инвестицион муҳити, экспорт салоҳияти самарадорлигини оширишга йўналтирилган турли халқаро кўргазма ва тадбирларда иштирок этиш мақсадида олиб келинаётган товар ва транспорт воситаларининг божхона расмийлаштируви амалга оширилади.

Божхона пости Ташқи ишлар вазирлиги Дипломатик корпусга хизмат кўрсатиш бюроси ҳудудида жойлашган.

Рақамларга мурожаат қилсак, божхона постида 2021 йилнинг 8 ойи давомида 1555 та божхона юк декларациялари  расмийлаштирилиб, улар бўйича 22 млрд. сўмдан ортиқ божхона тўловлари давлат бюджетига ўтказилиши таъминланди.

Божхона постида 8 ой давомида қиймати 21 млн. 762 минг АҚШ долларини ташкил қилувчи 1281 тн. оғирликдаги товар ва транспорт воситаларининг божхона назорати амалга оширилган.

Божхона постида хизмат жараёни қизиқарлилиги билан ҳам ажралиб туради.  Чунки, бу ерда турли миллат вакилларига мансуб хорижий шахсларнинг ўзлари билан юртимизга олиб келган ўз миллатларига хос бўлган турли миллий буюмларинининг ҳам божхона расмийлаштируви амалга оширилади.

Мазкур постда ишлаш бошқа божхона постларида ишлашдан кўра анча фарқ қилади. Божхона постида божхона расмийлаштируви жараёнларининг асосий иштирокчиларини чет эл фуқаролари, дипломатлар ҳамда элчилар ташкил этади. Бу эса пост ходимларидан юксак даражада этикет қоидаларига риоя қилиш, хушмуомала бўлиш, божхона назоратини тезкор тартибда амалга оширишни талаб этилади. Чунки, бизнинг фаолиятимизга қараб Ўзбекистон божхонаси тўғрисида уларда тасаввур пайдо бўлади.

Баҳром БАХТИЕВ,

“Чет эл ваколатхоналари” божхона пости бошлиғи