Мазкур учрашув, Сирдарё вилояти томонидан 2020-2021 йиллар давомида амалга оширилган экспорт-импорт операциялари кўрсаткичлари таҳлили ҳамда божхона органлари билан вужудга келиши мумкин бўлган низоларни муқобил ҳал этиш мавзусида бўлиб ўтиб, бугунги кунда давлатимиз томонидан тадбиркорликни қўллаб-қувватлашда берилаётган кенг имкониятларга алоҳида тўхталиб ўтилди.

Учрашув давомида экспорт-импорт операцияларини амалга оширилишида соддалаштирилган тартиб-тамойилларнинг жорий қилинганлиги ҳамда бу борада 2020-2021 йилларда амалга оширилган ишлар юзасидан ахборот берилди.

   Ўзбекистон Республикаси Божхона кодексининг 46-бобида кўрсатилган “Божхона тўловларини тўлаш тартиби ва муддатлари“, Ўзбекистон Республикаси Вазирлар Маҳкамасининг 2020 йил 10 февралдаги “Товарлар (ишлар, хизматлар)ни импорт қилишда қўшилган қиймат солиғи тўловчилар учун қўшилган қиймат солиғини тўлаш муддатини узайтириш тартиби тўғрисидаги низомни тасдиқлаш ҳақида”ги 76-сонли ва Ўзбекистон Республикаси Президентининг 2021 йил 3 мартдаги “Чорвачилик тармоқларини давлат томонидан янада қўллаб-қувватлашга доир қўшимча чора-тадбирлар тўғрисида”ги ПҚ-5017-сон қарорларидаги “Божхона тўловлари тўланишининг кечиктириб ёки бўлиб-бўлиб тўлаш тартиб-таомиллари” ва Ўзбекистон Республикасининг “Медиация тўғрисида”ги Қонуни асосида йиғилиш иштирокчиларига тегишли тушунчалар ва маслаҳатлар берилди.

Шу билан бирга, учрашув якунида корхонанинг маҳсулот ишлаб чиқариш жараёни билан яқиндан танишилди ва келгусидаги экспорт салоҳиятини кўпайтириш бўйича режаларини амалга оширишида божхона ходимлари томонидан яқиндан амалий ёрдам кўрсатилиши бўйича келишиб олинди.