Биргина божхона органлари мисолида айтадиган бўлсак, бугун соҳада тадбиркорлик фаолиятига эътибор жуда юқори. Кундан кунга божхона соҳасидаги тартиб-тамойиллар соддалаштирилиб, “Рақамли божхона”га ўтиш ва бу орқали тадбиркорларга янада қулайликлар яратиш асосий вазифа сифатида қараб келинмоқда. Қолаверса, соҳа ходимлари мунтазам тадбиркорлар билан учрашиб, тизимда уларга яратилаётган қулай имконият ва имтиёзлардан хабардор қилиш, шунингдек, уларни қийнаётган муаммоларни аниқлаш, ижобий ҳал этиш ҳамда ишбилармон тадбиркорларнинг таклифларини тинглаш соҳа ходимларининг асосий мақсадидир.

Ушбу вазифаларнинг жойлардаги ижроси билан танишиш ва ўрганиш юзасидан Давлат божхона қўмитаси раисининг биринчи ўринбосари И.Мухторов бошчилигидаги ишчи гуруҳ “Жиззах” эркин иқтисодий зонасида фаолият олиб бораётган “АДМ-Жиззах” МЧЖга ташриф буюрди.

Жамиятнинг асосий фаолият тури енгил автомобиллар ишлаб чиқаришдан иборат бўлиб, 2020 йилда иш фаолиятини йўлга қўйган. Автокорхона келажакда йиллик ишлаб чиқариш қуввати 125 минг дона енгил автомобилни ташкил этишни режалаштирилган. Қувонарлиси, бунинг натижасида 5000 та ишчи ўрни яратилади.

Шу куни ишчи гуруҳ Ш.Рашидов туманидаги “Шохрух Фарм” МЧЖга ҳам ташриф буюришди. Дори маҳсулотлари ишлаб чиқаришга мўлжалланган мазкур жамиятнинг номига Ҳиндистон давлатидан қиймати 242 750 АҚШ долларига тенг бўлган асбоб-ускуналар, жиҳозлар ва қурилиш материаллари олиб келинган. Учрашувда мутахассислар корхонадаги мавжуд муаммоларни ўрганишди ва тадбиркорга амалий ёрдам бериш бўйича тегишли чора-тадбирларни белгилаб олишди.

Шунингдек, ишчи гуруҳ томонидан корхоналар фаолияти жараёнида  юзага келиши мумкин бўлган муаммо ёки таклифлар юзасидан Давлат божхона қўмитасининг 11-08 ҳамда Жиззах вилояти божхона бошқармасининг 72-223-26-93 рақамларига қўнғироқ қилишлари мумкинлиги эслатиб ўтилди.