Тадбир аввалида Абдулла Қодирий номидаги маданият ва истироҳат боғи олдида буюк ёзувчи ҳайкалига ҳурмат бажо келтириб гуллар қўйилди.

Тадбирда Абдулла Қодирийнинг набираси Хуршид Абдуллаев сўз олиб, мамлакатимизда бугун аҳоли ва айниқса ёш авлодни Ватанга муҳаббат, миллий ва умуминсоний қадриятлар руҳида тарбиялаш ҳамда Ватанимиз истиқлоли, халқимизнинг озодлиги ва эркинлиги, келажак авлоднинг тинч ва фаровон ҳаётини таъминлаш йўлида мардона кураш олиб бориб азиз жонларини фидо қилган, мустабид тузум даврида қатағон қилинган аждодларимиз хотирасини абадийлаштириш, уларнинг фаолияти ва меросини ўрганиш ҳамда тарғиб этиш муҳим масала эканлигини таъкидлаб ўтди.

Шунингдек, у ўз сўзида ўзбек романчилиги асосчиси  ХХ аср янги ўзбек адабиётининг улкан намояндаси, ўзбек романчилигиниг асосчиси,
20-йиллардаги муҳим ижтимоий маданий жараёнларнинг фаол иштирокчиси Абдулла Қодирий 1894 йил 10 апрелда Тошкентда туғилгани, отаси Қодирбобо хон, беклар қўлида сарбозлик қилган, рус босқини пайтида Тошкент мудофаасида қатнашганини айтиб ўтди.

Шу ўринда айтиб ўтиш лозимки, Абдулла Қодирий отаси бошидан ўтган воқеалар унинг қатор асарлари, хусусан тарихий романларининг юзага келишида муҳим рол ўйнаган. У мусулмон мактабида, рустузем мактабида Абулқосим шайх мадрасасида таълим олди. Москвадаги адабиёт курсида ўқиди. Ёшлигиданоқ қадимги Шарқ маданияти ва адабиёти руҳида тарбия топган. Араб, форс ва рус тилларини ўрганган. Жаҳон адабиётини ихлос билан мутолаа қилган. Оиласи камбағаллашганлиги сабабли болаликдан мустақил меҳнат қила бошлади, турли касбларни эгаллади, маҳаллий савдогарларга котиблик қилди. Шунингдек, адиб “Муштум” журнали ташкилотчиларидан ва таҳрир ҳайъати аъзоси бўлиб ишлаганлигини айтиб ўтиб, Абдулла Қодирий сиймоси халқимиз тасаввурида адолат, ҳақиқат ва жасорат тушунчаларининг тимсоли сифатида из қолдиргани бежиз эмас. Абдулла Қодирийнинг 44 йиллик умри, 20 йиллик ижтимоий ва ижодий фаолият даври кескин курашлар, таъқибу таҳдидлар ичида ўтди. У 1937 йил 31 декабрь куни ҳибсга олинди. Шунингдек, тадбирда 9 ойлик қамоқдаги сўроқ-тергов, қийноқ, хўрликдан сўнг Чўлпон, Фитрат каби маслакдошлари билан бирга қатл этилганлиги айтиб ўтилди.

Шундан сўнг, божхона институти курсантлари Абдулла Қодирий номидаги маданият ва истироҳат боғи олдидаги музейга ташриф буюришди. Музейда адибнинг ҳаёт ва ижод йиллари хронологияси, қатағон йиллари экспонатлари ҳамда мустақиллик йилларида ёзувчига кўрсатилган эҳтиром акс этган экспозициялар билан танишишди. Божхона институти курсантлари залдаги улкан мониторда адиб асарлари асосида суратга олинган «Ўткан кунлар» ва «Меҳробдан чаён» фильмлари ва бошқа картиналарни кўришди.