Сурхондарё вилояти божхона бошқармасида божхона ходимлари, уларнинг оила аъзолари иштирокида “Коррупцияга қарши курашишда барчамиз масъулмиз!” мавзусида профилактик тадбир ташкил этилди.

Тадбирда бошқарманинг Коррупцияга қарши курашиш ва ўз хавфсизик бўлими бошлиғи Р.Акбаров томонидан ходимларда коррупцияга нисбатан муросасиз муносабатни шакллантиришда оиланинг ўрни беқиёслиги, коррупцияга қарши курашишда энг аввало ҳар бир божхона ходимида ҳалоллик иммунитетини ошириб, бу билан коррупциянинг ҳар қандай кўринишига муросасиз курашиш лозимлигини айтиб ўтди.

Шунингдек, тадбирда божхона соҳасида узоқ йиллардан бери фаолият олиб бораётган ходимлар ҳам сўзга чиқишиб, божхона ходимлари учун ташкил қилинган илгариги ва ҳозирги шароитлар ўртасида жуда катта фарқ борлигини  ҳозирда давлатимиз томонидан ходимларнинг ижтимоий ҳимоясига катта эътибор берилаётганлигини таъкидлашди.

Учрашув давомида, божхона тизимида ходимларга қулай шарт-шароитлар яратиш, кадрлар потенциалини мустаҳкамлаш, божхона ходимларининг ижтимоий ҳимояси борасида амалга оширилаётган катта ислоҳотларга, айрим нопок божхона ходимлари томонидан яратилаётган шароитларга шукроналик келтирмай тамагирлик, мансаб ваколати доирасидан четга чиқишлик каби салбий ҳолатларга йўл қўйилаётганлиги ачинарли ҳол эканлигини ва бугунги кунда божхона ходимларини нопок йўлларга кириб қолмаслиги учун барча, жумладан, уларнинг ота-оналари ҳамда оила аъзолари бирдек масъул эканлиги таъкидланди.

Тадбирда ходимларнинг ота-оналари ва оила аъзолари ҳам ўз фикрларини билдиришиб, Давлатимиз томонидан ходимларга қаратилаётган эътибор таҳсинга сазоворлиги, коррупцияга қарши курашиш йўналишда ҳам доимо ҳамкорликка тайёр эканликларини айтиб ўтишди.

Ҳақиқатда, жамиятда коррупцияга нисбатан муросасиз муносабатни қарор топтириш ўта долзарб масала бўлиб, гарчи уни бажариш доирасида масъул идоралар белгиланган бўлса-да, унинг тўлақонли рўёбга чиқиши учун ҳар бир инсон ўзида масъулиятни ҳис  этиши зарур. Мазкур масъулиятни оширишда эса оиланинг ўрни беқиёсдир.

Учрашув сўнгида, тадбир иштирокчиларига, таклиф ва мулоҳазалар юзасидан Давлат божхона қўмитасининг қисқа 11-08 ва вилоят божхона бошқармасининг 76-225-02-26 рақамли ишонч телефонлари эслатиб ўтилди.