Сирдарё вилояти божхона бошқармаси “Сирдарё” чегара божхона постига қўшни давлатдан кириб келган фуқаро А.Ф. бошқарувидаги “MАN-TGX18 440” русумли юк автотранспорт воситаси ўрнатилган тартибда инспекцион кўрик мажмуаси ёрдамида текширувдан ўтказилди.

Натижада, автомашинада йўл-юк кузатув ҳужжатларида ва йўловчи божхона декларациясида кўрсатилмаган ҳамда оғзаки савол-жавоб вақтида маълум қилинмаган умумий қиймати 31,4 миллион сўмлик маиший техника товарлари  борлиги аниқланди.

Яна бир холатда “Сирдарё” чегара божхона постига қўшни давлатдан кириб келган фуқаро О.Ш. бошқарувидаги “MАN” русумли юк автотранспорт воситаси божхона кўригидан ўтказилди.

Текширув давомида автомашинада олдиндан ясалган хуфя жойда умумий қиймати салкам 15 миллион сўмлик товар-моддий бойликлари борлиги аниқланиб, ашёвий далил сифатида олинди.

Ҳозирда юқоридаги ҳолатлар юзасидан божхона органлари томонидан суриштирув ҳаракатлари давом эттирилмоқда.