Андижон вилояти божхона бошқармаси Контрабандага қарши курашиш ва божхона аудити бўлими ходимлари Миллий гвардия ва Ички ишлар  идоралари билан ҳамкорликда Бўстон туманида тезкор тадбир ўтказишди.

Ўтказилган тезкор тадбир давомида Андижон-Тошкент йўналишида ҳаракатланиб кетаётган фуқаро Р.А. бошқарувидаги “Исузу” русумли автотранспорт воситаси тўхтатилиб ўрнатилган тартибда кўздан кечирилди.

Натижада, автомашинада Ўзбекистонда ишлаб чиқарилган матолар остига яшириб қўйилган, ҳеч қандай ҳужжатлари бўлмаган умумий қиймати 288 миллион сўмлик пиротехника воситалари борлиги аниқланди.

Тадбир давом эттирилиб, мазкур автотранспорт воситаси божхона бошқармасига олиб келиниб ўтказилган божхона кўриги натижасида, автотранспорт воситаси юкхонасига умумий қиймати 450 млн. сўмлик 1800 дона “Тропикамид” номли кучли таъсир қилувчи дори воситалари ҳам борлиги фош этилди.

Ҳолат юзасидан аниқланган умумий қиймати 738 млн. сўмлик пиротехника ҳамда “Тропикамид” дори воситалари ашёвий далил сифатида вақтинча сақловга олинди.

Ҳозирда ушбу ҳолат юзасидан божхона органлари томонидан  суриштирув ҳаракатлари давом эттирилмоқда.