Юртимизда ҳуқуқий демократик ва очиқ фуқаролик жамияти, эркин бозор муносабатларига асосланган иқтисодиётни қуриш, халқимиз учун обод ва фаровон ҳаёт барпо этиш, халқаро майдонда ўзимизга муносиб ўрин эгаллашда асосий Қонунимиз мустаҳкам замин бўлиб келмоқда.  Конституция – биз учун нафақат муҳим ҳаётий қўлланма, балки ғурур-ифтихор, керак бўлса, шу заминда истиқомат қилаётган, миллати, тили, динидан қатъи назар, барча инсонлар учун мустаҳкам бир ҳимоя.  Конституция - нафақат бугунги куннинг қомуси, балки у эртанги кунимиз, қураётган жамиятимиз истиқболини аниқлаб берувчи ҳужжат, фарзандларимиз йўлини ёритиб тургувчи маёқдир. Шундай экан, жамиятимиз ҳаётининг мезони бўлган Конституцияни чуқур ва ҳар томонлама ўрганишимиз, унинг маъносига етиб бориб, амалий ҳаётимизнинг доимий қўлланмасига айлантиришимиз даркор.

Бу йил юртимизда Конституция қабул қилинганлигининг 28 йиллиги барча идораларда кенг нишонланмоқда, шу жумладан божхона органларида ҳам ушбу тантанага алоҳида аҳамият қаратилмоқда.

Шу муносабат билан Тошкент вилояти божхона бошқармаси раҳбарияти ҳамда Ички ишлар вазирлиги Академияси профессори, юридик фанлари доктори Гулчеҳра Маткаримова иштирокида тантанали тадбир ташкил этилди.

Тадбирда Тошкент вилояти божхона бошқармаси бошлиғи Отабек Чориев сўзга чиқиб, “8-декабрь Ўзбекистон Республикасининг конституцияси қабул қилинган кун” байрам тадбирини очиқ деб эълон қилди ва юртимиз мадҳиясидан сўнг тадбир давом эттирилди.

Тадбир давомида Ички ишлар вазирлиги Академияси профессори, юридик фанлари доктори Гулчеҳра Маткаримова сўзга чиқиб, Конституциянинг ҳаётимизда аҳамияти, ҳуқуқий онг ва билим нақадар зарурлиги хақида маъруза қилиб, барчани яна бир бор байрам билан муборакбод этди.

Бугунги кунда Ўзбекистон Республикасида аҳоли сони 34 миллиондан ошган бўлиб, бу ўз навбатида Ўзбекистон Республикасининг ҳар бир фуқаросининг ҳуқуқ ва эркинликларини белгилашда конституция энг асосий конун ҳисобланади.

Шу кунга қадар мамлакатимиздаги туб ислоҳот ва ўзгаришларнинг барчаси Конституциямиз асосида амалга оширилмоқда. Бу эса унинг ҳақиқатан ҳам халқимиз манфаатларига, давлатимизнинг стратегик мақсадларига тўла жавоб берадиган, ҳар томонлама пухта ишланган муҳим сиёсий ҳужжат эканидан далолат беради.