Тошкент вилояти божхона бошқармаси Контрабандага қарши курашиш ва божхона аудити бўлими ходимлари томонидан Тошкент вилояти, Оҳангарон тумани ҳудудида тезкор тадбир ўтказилди.

Тадбир давомида фуқаро Қ.Х. бошқарувидаги “Исузу” русумли автотранспорт воситаси тўхтатилиб, ўрнатилган тартибда кўздан кечирилди.

Натижада, автомашина юкхонасида ҳеч қандай ҳужжатлари бўлмаган, хорижда ишлаб чиқарилган умумий қиймати 204 миллион сўмлик  150 дона телевизорлар борлиги аниқланди.

Яна бир ҳолатда фуқаро Ш.Ф. бошқарувидаги “Исузу” русумли автотранспорт воситаси тўхтатилиб, товарлар эгаси фуқаро А.А. иштирокида кўздан кечирилди.

Текширув давомида автоулов юкхонасида хорижда ишлаб чиқарилган, божхона расмийлаштирувидан ўтганлигини тасдиқловчи ҳужжатлари бўлмаган умумий қиймати 213,6 миллион сўмлик 797 дона миксер ва 12 дона  телевизорлар борлиги маълум бўлди.

Ҳозирда юқоридаги ҳолатлар юзасидан божхона органлари томонидан суриштирув ҳаракатлари давом эттирилмоқда.