“Коррупцияга қарши курашишда аҳолининг барча қатламлари,
энг яхши мутахассислар жалб қилинмас экан, жамиятимизнинг
барча аъзолари, таъбир жоиз бўлса, “ҳалоллик вакцинаси” билан
эмланмас экан, ўз олдимизга қўйган юксак марраларга эриша олмаймиз.
Биз коррупциянинг оқибатлари билан курашишдан унинг барвақт
олдини олишга ўтишимиз керак”

Ўзбекистон Республикаси Президенти 
Ш.М.Мирзиёев

Тошкент шаҳар божхона бошқармаси “Сирғали” ташқи иқтисодий фаолият божхона постида “Коррупцияга қарши курашишда барчамиз бирдек масъулмиз!” мавзусида профилактик тадбир ташкил этилди.

Таъкидлаш жоизки, коррупция ҳар қандай давлат ва жамиятнинг сиёсий-иқтисодий ривожланишига жиддий путур етказади, давлатнинг конституциявий асосларини ва қонун устуворлигини заифлаштиради, пировардида инсон ҳуқуқ ва эркинликларининг поймол бўлишига олиб келади.

Тадбирда жамиятда коррупцияга нисбатан муросасиз муносабатни шакллантириш, коррупция ва унга имкон бераётган омилларни вақтида аниқлаш ва унга ўз вақтида чек қўйиш давлат ва жамият ҳаётининг барча соҳаларидаги долзарб вазифа эканлиги, коррупцияга қарши курашишда энг аввало ҳар бир божхона ходимида ҳалоллик иммунитетини ошириб ва бу билан коррупциянинг ҳар қандай кўринишига муросасиз курашиш лозимлиги, Давлатимиз раҳбарияти томонидан яратиб берилаётган шарт-шароитларга бошқармада хизмат қилаётган ходимлар ўзининг Ватанга садоқати ҳамда ҳалол ва пок меҳнати билан жавоб қайтариши лозимлиги таъкидланди.

Божхона тизимида ходимларга қулай шарт-шароитлар яратиш, кадрлар потенциалини мустаҳкамлаш, божхона ходимларининг ижтимоий ҳимояси борасида катта ислоҳотлар амалга оширилаётганлиги, божхона ходимлари нопок йўлларга кириб қолмаслиги ва бундай ҳолатларни олдини олишда барча ходимлар бирдек маъсул эканлиги айтиб ўтилди.       

Тадбир сўнгида ходимлар ўз хизмат вазифаларини сидқидилдан бажаришлари, доимий равишда ўз устида ишлаб, билим савиясини ва тажрибаларини ошириб боришлари лозимлиги, атрофидаги ҳамкасбининг ҳар бир ноодатий хатти-ҳаракатларига бефарқ бўлмасликлари, ана шундай ҳолатлар кузатилганда бевосита пост ҳамда бошқарма раҳбариятини хабардор қилишлари мумкинлиги таъкидлаб ўтилди.

Маълумот ўрнида шуни айтиш лозимки, коррупцияга қарши курашиш йўналишида бошқарманинг тегишли тезкор тузилмалари томонидан шахсий таркибнинг хавфсизлигини таъминлаш, мансаб жиноятлари ва бошқа ножўя хатти-ҳаракатларга йўл қўйилишининг олдини олиш, божхона органлари имиджини ошириш ҳамда уларга юклатилган вазифаларни оғишмай бажарилишини таъминлаш мақсадида, жорий йилнинг 10 ойи давомида жами 50 маротаба умумий тартибда йиғилиш, семинар ва ўқув машғулотлари ўтказилган бўлса,  21 нафар ходимлар билан ноқонуний хатти-ҳаракатлар содир этилишини олдини олиш мақсадида якка тартибда профилактик суҳбатлар ўтказилган.

Хулоса ўрнида шуни айтишимиз мумкинки, коррупция мураккаб ижтимоий ҳодиса бўлиб, унга қарши курашиш учун алоҳида чораларни қўллаш самарали ҳисобланмайди, коррупцияга қарши курашишда давлат ва жамиятнинг ўзаро жипслиги талаб этилади. Шу сабабдан фуқаролардан божхона қонунчилиги бузилишига доир ҳолатлар юзасидан Ўзбекистон Республикаси Давлат божхона қўмитасининг қисқа 11-08 рақамли ҳамда Тошкент шаҳар божхона бошқармасининг (78)  120-76-76 телефон рақамига қўнғироқ қилишларини сўраб қоламиз.

Зеро, бу йўналишда олиб борилаётган ислоҳотлар фуқаролар томонидан ҳам фаоллик кўрсатилсагина, кўзланган натижани бериши мумкин. Шундай экан коррупцияга қарши курашда жамоатчилик назоратини кучайтиришимиз, барчамиз бирга ҳаракат қилмоғимиз зарур. Бунда коррупцияга қарши курашиш фаолиятининг мақсади ва объекти сифатида алоҳида олинган коррупционер эмас, балки ушбу хатти-ҳаракатларни амалга оширишга шароит яратиб берувчи ҳолатларни бартараф қилишимиз, унинг олдини олиш чораларини кўрган ҳолда ҳаракат қилмоғимиз лозим бўлади.

Жахонгир Сатторов,
“Сирғали” ТИФ божхона пости инспектори