Айниқса, ёшларни маданият, санъат, жисмоний тарбия ва спортга кенг жалб қилиш, уларнинг ахборот технологияларидан фойдаланиш кўникмаларини шакллантириш, китобхонликни кенг тарғиб қилиш, хотин-қизлар бандлигини оширишга қаратилган 5 та муҳим ташаббус ҳаётга самарали татбиқ этилмоқда.

Ушбу ислоҳотларнинг мазмун-моҳиятини халқимизга, айниқса ўсиб келаётган ёш авлод онгига сингдириш  мақсадида пойтахтимизнинг Шайхонтоҳур туманида жойлашган  84-сонли умумтаълим мактабида Давлат божхона қўмитасининг Божхона институти, Шайхонтоҳур туман ҳокимлиги, Маҳалла ва оилани қўллаб-қувватлаш вазирлиги, Ўзбекистон Ёзувчилар уюшмаси, Республика Маънавият ва маърифат маркази билан ҳамкорликда "Янги Ўзбекистон — янгича дунёқараш" шиори остида маданий-маърифий тадбир ташкил этилди.

Тадбир давомида иштирокчилар томонидан юртимизда амалга оширилаётган ислоҳотларнинг мазмун-моҳияти ва аҳамияти тушунтириб берилди. Тарғиботчилар гуруҳлари томонидан билдирилган фикрлар ва намойиш этилган саҳна кўринишлари шунингдек, ватанни мадҳ этувчи куй-қўшиқлар тадбир қатнашчиларига кўтаринки кайфият бағишлади.

Маънавий-маърифий тадбир доирасида фаол ўқувчилар, Божхона институти курсантларининг ватанни мадҳ этувчи шеърий чиқишлари тадбирга ўзгача файз бағишлади.

Шунингдек, ёшлар ўртасида китобхонликни кенг тарғиб қилиш мақсадида 84-сонли умумтаълим мактабида таҳсил олаётган, турли спорт мусобақаларида фахрли ўринларни қўлга киритган бир гуруҳ ёшларга “Ватанни мадҳ этувчи” ва “Ҳарбий ватанпарварлик” руҳидаги қўшиқлар ҳамда видеороликлар жамланган дисклар совға қилинди.