Мамлакатимизда ҳам озиқ-овқат хавфсизлигини таъминлаш бўйича кенг кўламли ишлар амалга оширилмоқда.

Хусусан, Президентимиз Ш.Мирзиёев томонидан ўтказилган “Озиқ-овқат хавфсизлигини таъминлаш бўйича қўшимча чора-тадбирлар тўғрисида” кенгайтирилган видеоселектор йиғилишида ҳам ҳозирги кунда кузатилаётган пандемия шароитида аҳолини барқарор озиқ-овқат маҳсулотлари билан таъминлаш вазифаси берилган эди.

Мазкур йиғилишда берилган топшириқлардан келиб чиқиб, Сурхондарё вилояти божхона бошқармаси ходимлари томонидан озиқ-овқат маҳсулотларига бўлган эҳтиёжни узлуксиз таъминлаш мақсадида, Термиз тумани ҳудудидаги 3 гектар ер майдонида (Шундан; ерёнғоқ 90 сотих, тарвуз 80 сотих,  маккажўхори 45 сотих, булғор қалампири 25 сотих, бақлажон 5 сотих, қовун 5 сотих, қовоқ 10 сотих, помидор 10 сотих, бодринг 5 сотих, ҳандалак 5 сотих ва бошқа қишлоқ хўжалиги маҳсулотлари 20 сотих) ходимлар ўз ташаббуслари билан ишдан бўш вақтларида турли сабзавот ва полиз экинларини экишмоқда. Мавжуд экин майдонидан унумли фойдаланиш мақсадида бир қарич жой ҳам бўш қолдирилмаган. Етиштирилган маҳсулотларнинг деярли барчаси ҳосилга киришга ҳам улгурди. Йиғиб олинган маҳсулотлар ходимларнинг  эҳтиёжига қараб етказиб берилмоқда.

Бундан хулоса қилишимиз мумкинки, ходимларимиз томонидан мавжуд вазиятни инобатга олган ҳолда ушбу соҳада амалга оширилаётган ишлар бугунги кунда юритилаётган ислоҳотларга бефарқ эмаслигидан далолат беради.

Халқимиз  қадимдан ердан унумли фойдаланиш ҳадисини олган. Бугун ҳар бир ватандошимиз томорқасидан унумли фойдаланиш орқали оиласини фаровон, дастурхонини эса тўкин қилиши шубҳасиз.

Азиз ҳамкасблар! Бу кунларда карантин сабаб кўпчилигимиз хонадонимизда, ўз оиламиз билан биргамиз. Ота-оналаримиз хизмати, фарзандлар тарбияси билан бир қаторда томорқамизда мавжуд экин майдонларидан унумли фойдаланган ҳолда рўзғоримиз учун зарурий экинларни эксак бир кун ўз мевасини беради. Қолеверса, халқимизда “Ерни боқсанг, ер сени боқади” деган нақл ҳам бежиз айтилмаган.