Тадбиркорлар ва ТИФ
иштирокчилари учун доимий
ишонч телефони
11-08
Усти қалтироқ – ичи ялтироқ!
1958
Ҳа, ушбу иборани тескари қўллаганимизга ҳайрон қолманг. Андижон вилояти божхона бошқармаси “Дўстлик” чегара божхона пости орқали қўшни давлатдан кириб келган фуқаро Ю.Х.нинг устомонлиги негадир бизга ана шу тескари нақлни эслатди.
Усти қалтироқ – ичи ялтироқ!

Пост орқали ҳаракатланаётган айрим жисмоний шахсларнинг ҳали ном қозониб улгурмаган, шу сабаб бошқаларига нисбатан бироз арзон ҳисобланадиган, бир хил русумдаги телевизорларни олиб ўтишаётгани пост ходимларини шубҳалантириб қўйди.

Шундан сўнг, телевизорларни кўздан кечириш мақсадида қутисидан очиб кўрилганида, бутунлай бошқа манзара намоён бўлди. Қаранг-ки, бошқа савдо белгиси туширилган қутиларда таниқли брендлар остидаги бутунлай бошқа русум ва ўлчамдаги қимматбаҳо телевизорлар яширилган экан.

Нега дейсизми? Хабарингиз бор, амалдаги тартибларга кўра қўшни давлатдан пиёда равишда кириб келаётган жисмоний шахслар 300 АҚШ долларигача бўлган қийматдаги товарларни божсиз олиб киришларига рухсат этилган. Аммо, ушбу ҳолатда эса ҳар бир телевизорнинг нархи 3 млн. сўмни ташкил қилганини инобатга олсак, бу белгиланган нормадан ортиқча эканлиги маълум бўлади.

Суриштирувлар давомида, шу зайлда олиб ўтишга уринилган 4 дона телевизорларнинг барчаси фуқаро Ю.Х.га тегишли бўлиб чиқди. У телевизорларни пост орқали олиб ўтишга уринган шахсларни аслида ушбу товарларни маълум бир ҳақ эвазига ташиб бериш учун ёллаган экан.

Ҳозирда ушбу ҳолат юзасидан текширув ҳаракатлари давом эттирилмоқда.

Эслатиб ўтамиз, 2018 йилнинг 1 июлидан бошлаб, белгиланган меъёрлар доирасида қўшни давлатлардан телевизорларни божхона тўловларини тўламай, 1 календарь ойида чегарани биринчи маротаба кесиб ўтаётганда фақат 1 донадан олиб ўтишга рухсат этилади.

Давлат божхона қўмитаси

Ахборот хизмати

26.08.2018

Эшитиш учун матнни белгиланг ва ушбу тугмани босинг