Хусусан, Тошкент халқаро аэропортига хориждан учиб келган ва яшил йўлак орқали ҳаракатланган фуқаро М.А.нинг безовталаниши божхоначилар эътиборини тортди ҳамда ушбу шахснинг юклари ўрнатилган тартибда божхона кўригидан ўтказилди. 

Шундан сўнг, унга тегишли сумка назорат-рентген ускунаси орқали кўздан кечирилганида, сумка ичидаги ичидаги картон қоғозларнинг экрандаги тасвири шубҳали тус олди. Ушбу картон қоғозлар белгиланган тартибда очиб кўрилганда уларнинг ичига моҳирлик билан 60 минг АҚШ доллари яшириб жойлаштирилганлиги аниқланди.

Йўловчи божхона декларациясида ва божхона ходимларининг оғзаки сўрови пайтида маълум қилинмаган, божхона назоратидан яширинча олиб ўтишда тўхтатиб қолинган ушбу валюталарни синчиклаб кўздан кечириш давомида божхона ходимларини шубҳалантирган яна бир жиҳат фош бўлган.

Гап шунда-ки, бир қарашда ҳақиқийдек туюлган купюраларнинг барчаси қалбаки бўлиб, буни қалбаки купюраларни аниқлашга ихтисослашган валюта детектори ҳам тасдиқлади. Энг қизиғи шундаки, купюраларнинг серия рақамлари бир хил бўлиб, уларнинг барчаси қалбаки эканлиги фош бўлди.

Сохта долларлар ашёвий далил сифатида олиниб, ҳолат юзасидан жиноят иши қўзғатилди.

Таъкидлаш жоизки, Ўзбекистон Республикаси Жиноят кодексининг 176-моддасига биноан қалбаки пул, акциз маркаси ёки қимматли қоғозлар ясаш, уларни ўтказиш учун жиноий жавобгарлик белгиланган.