Китобхон бўлган халқ ва китоб мутолааси доимо инсонларни эзгуликка етаклаган. Шу муносабат билан 2020 йил 8 февраль куни Сирдарё вилояти божхона бошқармасида «Ўзбекистон давлат китоб савдо таъминоти» масъулияти чекланган жамияти билан ҳамкорликда китоб ярмаркаси ташкил этилди.

Унда мамлакатимизнинг етакчи нашриётларининг 1000 дан ортиқ номдаги илмий ва бадиий нашрлари тақдим этилди. Ярмарка доирасида тақдим этилган бир қатор адабиётлар, жумладан буюк бобокалонимиз Амир Темур ҳаётлари ва босиб ўтган йўллари ҳақида, таниқли адибларимиз Абдулла Қодирийнинг “Ўтган кунлар”, Тоҳир Маликнинг «Одамийлик мулки», «Саодат саройининг калити», «Виждон уйғонур», Худойберди Тўхтабоевнинг бир қатор асарлари ва бошқа адабиётлар тадбир иштирокчиларида катта қизиқиш уйғотди. Ярмарка якунида божхоначилар томонидан кўплаб адабиётлар харид қилиндики, бу уларнинг маънавий оламини бойитишга хизмат қилиши, шубҳасиз.

Барчамиз ана шундай тадбирларни кўпайтириш тарафдоримиз. Зеро, китобхонлик бугун барча соҳа вакили учун сув ва ҳаводек зарур.