Хусусан, Давлат божхона қўмитаси Контрабанда ва божхона қонунчилиги бузилишига қарши курашиш бошқармаси ходимлари маиший техника буюмларининг яширин айланмасига қарши Тошкент ва Наманган вилоятларида тезкор тадбир ўтказишди.

Наманган вилоятида ўтказилган тадбир давомида фуқаро А.Д.нинг яшаш хонадони ўрнатилган тартибда холислар иштирокида назоратдан ўтказилди. Текширув давомида ушбу шахс ўз уйидан яма сифатида фойдаланиб, ноқонуний тарзда умумий қиймати 53 миллион сўмлик 30 дона телевизорлар ва 8 дона духовкаларни сақлаётганлиги аниқланди.

Тезкор тадбир Тошкент вилоятида давом эттирилиб, фуқаро Т.Б. бошқарувидаги “Исузу” автомашинаси назоратдан ўтказилди. Натижада, автомашина юкхонасида тегишли ҳужжатлари бўлмаган 51,8 миллион сўмлик 5 дона кондиционерлар, 10 дона музлатгичлар, 10 дона стабилизатор ва 539 дона ғалтак иплар борлиги аниқланди.

Ўтказилган тезкор тадбир давомида умумий қиймати 104,8 миллион сўмлик маиший техника товарлари ашёвий далил сифатида олинди.

Ҳозирда юқоридаги ҳолат юзасидан божхона органлари томонидан суриштирув ҳаракатлари давом эттирилмоқда.