Муҳтарам Президентимиз Шавкат Мирзиёев раҳнамолигида хотин-қизларнинг ижтимоий-сиёсий фаоллигини ошириш, саломатлигини муҳофаза қилиш, интилиш ва ташаббусларини қўллаб-қувватлаш, уларга муносиб меҳнат ва яшаш шароитларини яратишга алоҳида эътибор қаратилмоқда.

Жумладан, Давлат божхона қўмитасининг Божхона институтида ҳам хотин-қизлар самарали фаолият кўрсатиб, божхона органларига кадрларни тайёрлашда ўз ҳиссаларини қўшмоқдалар. Фаолият кўрсатаётган ва таҳсил олаётган хотин-қизларни ижтимоий қўллаб-қувватлаш, уларнинг фаоллигини ошириш мақсадида жорий йилда Божхона институтида Давлат божхона қўмитаси хотин-қизлар қўмитаси, Шайхонтоҳур туман ҳокимлиги билан ҳамкорликда “Маънавий-ахлоқий фазилатлар аёл кўзгусидир” мавзусида давра суҳбати ташкил этилди.

Давра суҳбати давомида, юртимиз равнақи, фарзандларимизнинг, хусусан қизларимизнинг билимли, ҳар жиҳатдан баркамол бўлиб улғайишида, жамиятимизнинг маънавий-маърифий жиҳатдан юксалишида аёлларимизнинг ўрни ҳақида сўз борди.  Юксак маънавиятли ва маърифатли, намунали одоби ва тарбияси билан эътироф этилган оналаримизнинг издошлари бугун давлат ва жамият қурилишида, ишлаб чиқаришда, илм-фан, маданият, тиббиёт, таълим ва ҳатто ҳарбий соҳада хизматлари беқиёс эканлиги айтиб ўтилди.

Шунингдек, йиғилишда маърузачилар томонидан қиз болани барвақт турмушга бериш, эрта фарзанд кўриш, шу билан бирга қариндош-уруғлар ўртасидаги никоҳларнинг салбий оқибатлари борасида ҳам маълумотлар берилди.