Жумладан, Давлат божхона қўмитаси Контрабанда ва божхона қонунбузилиши ҳолатларига қарши курашиш бошқармаси ходимлари ҳуқуқни муҳофаза қилувчи бошқа орган вакиллари билан ҳамкорликда Фарғона вилояти Ўзбекистон туманида тезкор тадбир ўтказишди.

Тезкор тадбир давомида кузатувга олинган қўшни мамлакат билан чегарадош ҳудуддаги айланма йўллар орқали ҳаракатланиб келаётган фуқаро У.К.бошқарувидаги “Исузу” ва фуқаро К.Н. бошқарувидаги “Дамас” русумли автомашиналар тўхтатилиб, белгиланган тартибда холислар иштирокида текширувдан ўтказилди.

Натижада, “Исузу” автоуловининг юкхонасида 667,6 миллион сўмлик ва “Дамас”нинг юкхонасида 42,1 миллион сўмлик тегишли ҳужжатлари бўлмаган, сифати кафолатланмаган дори-дармон, озиқ-овқат маҳсулотлари ва бошқа турдаги товар-моддий бойликлари борлиги аниқланди.

Тезкор суриштирувлар натижасида аниқланишича, ушбу умумий қиймати 709,7 миллион сўмни ташкил этувчи товарлар “Исузу”да келаётган фуқаро У.М.га тегишли эканлиги маълум бўлди.

Ҳозирда мазкур ҳолат юзасидан божхона органлари томонидан суриштирув ҳаракатлари давом эттирилмоқда.