Видеоконференция тарзида ташкил этилган семинарда нафақат пойтахтимиздаги, балки республикамизнинг барча ҳудудларидаги тадбиркорлар, хусусан Россия Федерациясига товарларни экспорт қилиб келаётган ташқи иқтисодий фаолият иштирокчилари қатнашишди.

Мазкур семинарнинг аҳамияти шундаки, бу ерда тадбиркорлар экспорт ва импорт жараёнларида дуч келадиган муаммоларни бир жойнинг ўзида иккала давлат божхона хизмати вакиллари билан муҳокама қилиш имконига эга бўлишди.

Таъкидиланишича, Ўзбекистон Республикаси ва Россия Федерацияси ўртасида тузилган “Соддалаштирилган божхона йўлаги” Битими маҳаллий қишлоқ хўжалиги маҳсулотларини Россия Федерациясига экспорт қилувчилар учун божхона тартиб-таомилларини енгиллаштиришга имкон берадиган ноёб лойиҳа ҳисобланади.

Битимнинг устуворлиги шундаки, соддалаштирилган божхона тартиб-таомиллари ҳисобига Ўзбекистон қишлоқ хўжалиги маҳсулотларининг Россия бозорларига қисқа муддатда етказилиши таъминланади.

Битим қоидалари ҳалол экспорт қилувчилар учун улкан имконият бўлиб, божхона қонунчилигининг бузилиши хавфи бўлмаган қишлоқ хўжалиги маҳсулотларига нисбатан энг аввало божхона кўриги қўлланилмаслигини назарда тутади.

Қишлоқ хўжалиги маҳсулотларининг тез айниши инобатга олинса, тадбиркорлар учун бу енгиллик айни муддао. Сабзавотлар, мевалар сархил ҳолатида, айнимасдан туриб, мижозга етказилади.

Рақамларга мурожаат қилсак, 2019 йилнинг ўтган 10 ойи давомида Россия Федерациясига Ўзбекистондан 236,5 минг тонна қишлоқ хўжалиги маҳсулотлари экспорт қилинган. 2018 йилга нисбатан солиштирилганда бу кўрсаткич 14 фоизга кўп демакдир. Лекин, Ўзбекистоннинг қишлоқ хўжалиги маҳсулотлари етиштириш бўйича мавжуд салоҳиятидан келиб чиқилса, бу кўрсаткични янада ошириш имкони мавжуд.

Шу сабабли ҳам қизғин муҳокамалар остида бўлиб ўтган семинар ташқи иқтисодий фаолият иштирокчиларининг таклиф-мулоҳазаларини тинглаш орқали экспорт жараёнларини янада соддалаштириш ва тезлаштиришга қаратилган чора-тадбирларни белгилаб олишга хизмат қилди.