Ёш божхона ходимларини ўз тарихига ҳурмат руҳида тарбиялаш, уларда аждодлар қолдирган бой маданий меросни асраб авайлаш туйғуларини шакллантириш ҳамда уларга маънавий ҳордиқ улашиш мақсадида Сурхондарё вилояти божхона бошқармасининг Ёшлар иттифоқи бошланғич ташкилоти ва  вилоят археология музейи билан ҳамкорликда ёш божхоначилар иштирокида маънавий-маърифий тадбир ташкил этилди.

Мазкур тадбирда, божхона ходимлари бевосита Термиз шаҳридаги археология музейига ташриф буюришиб, воҳа ва Ўзбекистон тарихига оид маданий мерослар билан яқиндан танишдилар. Эътиборли жиҳати шундаки, мазкур музейда алоҳида хона ташкил этилган бўлиб, у ерда вилоят божхона бошқармаси томонидан юртимизга қайтарилган маданий мерослар сақланмоқда. Бу эса ёш божхоначилар қалбида ғурур ва ўз касбига садоқат туйғуларини янада оширади, десак муболаға қилмаган бўламиз.

Тадбир давомида, музей илмий ходимлари музейи фаолияти, ундаги экспонатлар ҳақида маълумот бердилар. Шунингдек, божхоначилар ўзларини қизиқтирган саволларга мутахассислар томонидан тўлақонли жавоб олдилар.