Хоразм вилояти божхона бошқармаси томонидан вилоятда инвестицион лойиҳалар асосида ташкил этилаётган корхоналарга амалий ёрдам кўрсатиш ишлари доимий тарзда амалга оширилмоқда. Бу борада тадбиркорлар билан самарали алоқалар йўлга қўйилган. Хонқа туманида жойлашган “CILASUN TASHKENT” МЧЖ хорижий корхонасида бўлиб ўтган учрашув айнан шу масалага қаратилди.

Корхона йилига 2000 тонна пахта толасини қайта ишлаб, калава ип ишлаб чиқаришга ихтисослаштирилган. Ўтган давр мобайнида корхона томонидан 2,8 миллион АҚШ доллар миқдорида тўғридан-тўғри инвестиция киритилган.

Корхонада ишлаб чиқариш, сифатни бошқариш тизимининг ISO 9001:2008 талабларига мувофиқ йўлга қўйилган бўлиб, ҳозирги кунда 70 дан ортиқ ишчи ходимлар фаолият кўрсатмоқда. Ишлаб чиқарилаётган маҳсулотларнинг асосий қисми чет давлатларга Россия Федерацияси, Беларуссия ва Польша Республикаларига экспорт қилинмоқда.

Корхонага замонавий ва энергия тежовчи ускуналар ўрнатилиши орқали модернизация қилиш бўйича инвестицион лойиҳаларнинг манзилли дастурига асосан умумий қиймати 3 миллион АҚШ доллари миқдоридаги қуввати 1500 тонна калава ип ишлаб чиқаришга ихтисослашган замонавий ускуналар Германиянинг Трюшлер ва Шляфхорст компанияларидан  келиши бошлади дейди – корхона раҳбари Юсуфжон Садиқов.

Янги лойиҳа амалга оширилиши билан корхонада ишлаб чиқариш қуввати яна икки баробарга ошади. Натижада 50 та янги ишчи ўринлари яратилади. Ушбу дастгоҳларда сифатли ва экспортбоп калава ип ишлаб чиқариш йўлга қўйилади.

Учрашувда жорий йил 1 мартдан бошлаб хавфни автоматлаштирилган бошқариш тизими томонидан автоматик танлов асосида “қизил” ва “сариқ” йўлаклардан ташқари “кўк” ва “яшил” йўлаклар ишга тушганлиги тўғрисида ҳам маълумот берилди.

Шунингдек, божхона соҳаси бўйича савол, таклиф ва мулоҳазалар бўлганда, юридик ва жисмоний шахсларнинг қонуний ҳуқуқ ва манфатларини ҳимоя қилиш мақсадида йўлга қўйилган Давлат божхона қўмитасининг қисқа рақамли 11-08 “Ишонч телефони”га қўнғироқ қилишлари мумкинлиги эслатиб ўтилди.