Тадбиркорлар ва ТИФ
иштирокчилари учун доимий
ишонч телефони
11-08
Ҳуқуқбузарлик ҳолатларини олдини олишга барчамиз бирдек масъулмиз
1847
Самарқанд вилоят божхона бошқармаси томонидан Ўзбекистон Республикаси Президентининг 2019 йил 9 январдаги ПФ-5618-сонли “Жамиятда ҳуқуқий онг ва ҳуқуқий маданиятни юксалтириш тизимини тубдан такомиллаштириш тўғрисида”ги Фармони ижросини таъминлаш мақсадида Булунғур қишлоқ хўжалик касб-ҳунар коллежида тарғибот тадбири ўтказилди.
Ҳуқуқбузарлик ҳолатларини олдини олишга барчамиз бирдек масъулмиз

Унда Самарқанд вилоят божхона бошқармаси раҳбарияти ва ходимлари, туман хотин-қизлар қўмитаси, ички ишлар бўлими, маҳалла хайрия жамғармаси туман бўлими, туман Ёшлар иттифоқи вакиллари, маҳалла фаоллари, тадбиркорлар ва туман халқ таълими бўлимига қарашли мактабларнинг директор ўринбосарлари ҳамда “Булунғур ҳаёти” газетаси мухбирлари иштирок этишди.

Йиғилишда сўзга чиққан вилоят божхона бошқармаси бошлиғи биринчи ўринбосари Ш.Салихов, Суриштирирув ва маъмурий амалиёт бўлими бош инспектор суриштирувчиси Ф.Ахроров, Булунғур туман ИИБ бошлиғи ўринбосари А.Йўлчиев ва Маҳалла хайрия жамғармаси туман бўлими раиси А.Маллаев профилактик тадбирларни ўтказишдан кўзланган асосий мақсад ҳуқуқбузарликларнинг олдини олиш, халқ осойишталигини таъминлаш эканлигини алоҳида қайд этиб, тадбирлар давомида эътибор қаратилиши лозим бўлган жиҳатларга тўхталишди.

– Божхона соҳасида ҳуқуқбузарлик ҳолатларини олдини олиш, чегара божхона постларидан таъқиқланган ва белгиланган меъёрлардан ортиқча товарларни олиб кириш ва олиб чиқишга йўл қўймаслик, мамлакатимизнинг иқтисодий хавфсизлигини таъминлаш фақат божхона органларининг иши, деб қараш нотўғри. Бу – барчанинг иши, – деди вилоят божхона бошқармаси бошлиғи биринчи ўринбосари Ш.Салихов. – Бугун тадбирда қатнашаётган барча иштирокчилар, маҳалла раислари ва фаоллари, профилактика инспекторлари ҳамда ёшлар биргаликда тарғибот-ташвиқот ишларини амалга оширишимиз даркор. Шундагина “Жартепа” ва “Самарқанд аэропорти” чегара божхона пости орқали ҳаракатланаётган йўловчилар томонидан ҳуқуқбузарлик ҳолатларини содир этилишини олдини олган бўламиз.

Таҳлилларга эътибор қаратсак, ўтган 2018 йил давомида Булунғур туманида яшовчи фуқаролар томонидан республика ҳудудида 34 та ҳуқуқбузарлик ҳолати аниқланиб, шундан 13 та ҳолатни Самарқанд вилояти божхоначилари аниқлашган.

Тадбирда оилаларимиз тинчлигини таъминлаш, хотин-қизларнинг жамиятимиз ҳаётида тутган ўрни ҳамда баъзи бир аёлларимиз томонидан ҳуқуқбузарлик содир этаётган ҳолатлар учраб турганлиги тўғрисида вилоят божхона бошқармасининг хотин-қизлар қўмитаси бошланғич ташкилоти раиси Ф.Исматова тўхталиб ўтди.

Шундан сўнг тадбир савол-жавоб тариқасида давом этиб, унда иштирокчилар божхона тартиб қоидалари, тадбиркорларга берилаётган имтиёзлар ҳамда ДБҚнинг Божхона институтига ҳужжатларни топшириш тартибига оид ўнлаб саволлар билан божхоначиларга мурожаат этишди.

 Самарқанд вилояти

божхона бошқармаси

Ахборот хизмати

26.02.2019

Эшитиш учун матнни белгиланг ва ушбу тугмани босинг