Tadbirkorlikni yo`lga qo`ygan ayollar faoliyatida paydo bo`layotgan muammoli vaziyatlarga echim topish, tadbirkorlikni rivojlantirish bo`yicha yo`l ko`rsatish va gender tenglik masalalari yuzasidan muhokamalarni ilgari surgan mazkur uchrashuvda Savdo sanoat palatasi va Markaziy bank Andijon viloyati boshqarmasi vakillari ham ishtirok etdilar.

Tadbirni Andijon viloyati bojxona boshqarmasi boshlig`i E.Rayxonov ochib, bugungi kunda davlat va jamiyat boshqaruvida ayollarning o`rni va mavqeini yanada mustahkamlash borasida mamlakatimizda amalga oshirilayotgan ishlar xususida to`xtalib o`tdi.

Shuningdek, tadbirda ishtirokchi ayollardan o`z faoliyatida bojxona sohasiga oid har qanday muammoli vaziyatlarni ijobiy hal etishda bojxona organi eshiklari doimo ochiq ekanligini ta’kidlab o`tildi.

Markaziy bankning Andijon viloyati boshqarmasi vakili S.Mirzajonova tomonidan esa imtiyozli kreditlar ajratish shartlari, bugungi kunda ayollarga yaratilgan imkoniyatlar bilan ishtirokchilarni tanishtirib o`tildi.

Darhaqiqat, so`nggi yillarda mamlakatimizda misli ko`rilmagan islohotlar amalga oshirilayotganligi, xotin-qizlarning jamiyatimiz hayotidagi o`rnini yanada mustahkamlash, ular uchun teng sharoitlar yaratib berishga katta e’tibor qaratilayotganligi, xotin-qizlarning o`z imkoniyatlarini to`laqonli ro`yobga chiqarishlari uchun barcha shart-sharoitlarni ta’minlash davlat siyosati darajasiga ko`tarilayotganligi sir emas.

Uchrashuv davomida tadbirkor ayollar o`zlarini qiziqtirgan turli savollarga javob oldilar.