Yuqoridagilarni inobatga olgan holda Namangan viloyat bojxona boshqarmasi tomonidan ham jamiyatda korrupsiyaning oldini olish borasida tadbirkorlar, aholi, keng jamoatchilik vakillari va shaxsiy tarkib bilan turli uchrashuvlar, davra suhbatlari tashkil etilib, tadbir doirasida ishtirokchilarga mazkur illatning salbiy oqibatlari tushuntirilib, mavzuga oid normativ huquqiy hujjatlar aks ettirilgan buklet va flayerlar tarqatishga ham alohida eʼtibor qaratilmoqda. Qolaversa, oʻquv maskanlari, mahalla, korxona va tashkilotlarda keng jamoatchilik oʻrtasida oʻtkazilayotgan anonim soʻrovnomalar ham korrupsiyaning oldini olishda muhim omil boʻlishi shubhasiz.
Bundan tashqari, boshqarma tomonidan korrupsiyaga qarshi kurashish borasida respublika va mahalliy ommaviy axborot vositalari bilan yaqin hamkorlik aloqalari yoʻlga qoʻyilgan boʻlib, mavzuga oid videolavhalar va materiallar muntazam yoritib borilmoqda.
Shu oʻrinda alohida taʼkidlash lozimki, ushbu salbiy illatning oldini olish va unga qarshi kurashda Namangan viloyati bojxona boshqarmasining (69) 234-33-01 raqamli ishonch telefonlari ham muhim ahamiyat kasb etmoqda. Yaʼni, sohaga oid biror bir taklif va mulohazalar yuzaga kelganda fuqarolar mazkur raqamlarga bogʻlanishlari mumkin.
Xulosa oʻrnida aytganda, korrupsiyaga qarshi kurashish, bu borada jamoatchilik nazoratini mustahkamlash hamda aholining huquqiy bilimi va madaniyatini yuksaltirish bugun eng asosiy vazifalardan biri etib belgilangan. Sababi, xalqimiz adolat qaror topgan jamiyatda yashasagina davlat organlariga nisbatan ishonchi ortadi, qolaversa, mamlakatimizning iqtisodiy oʻsishi yanada ijobiy tomonga yuksalaveradi. Bu yoʻlda esa nafaqat tegishli davlat organlari, balki har bir fuqaro oʻz hissasini qoʻshishi zarur.