Tezkor tadbir davomida avvaldan kuzatuvga olingan fuqaro F.B. boshqaruvidagi “Epika” rusumli avtotransport vositasi belgilangan tartibda koʻzdan kechirilganida, avtotransport vositasi saloni orqa oʻrindigʻida 1 dona polietilen oʻram borligi aniqlandi.

Mazkur oʻram ochib koʻrilganida esa, uning ichidagi modda ekspertiza xulosasiga koʻra, sof ogʻirligi 1 kg. 17 gr.ni tashkil qiluvchi “gashish” giyohvandlik vositasi ekanligi maʼlum boʻldi.

Tezkor tadbirlar davomida shu kuni Samarqand tumanida istiqomat qiluvchi yana bir shaxs B.B.ning xonadoni ham belgilangan tartibda koʻzdan kechirilganida, yertoʻladagi avtomobil balloni shinasi ichiga 3 dona polietilen oʻramlar yashirib qoʻyilganligi fosh qilindi.

Mazkur oʻramlarning birida 1 kg. 25 gr. ogʻirlikdagi “gashish”, qolgan ikkita oʻramda esa 2 kg. 65 gr. ogʻirlikdagi “opiy” – jami 3 kg. 90 gr. ogʻirlikdagi giyohvandlik vositalari borligi aniqlandi.

Shunday qilib, mazkur tadbir davomida ogʻirligi jami 4.1 kg.dan ziyod giyohvandlik vositalari ashyoviy dalil sifatida olib qoʻyildi.

Mazkur holat yuzasidan jinoyat ishi qoʻzgʻatilib, tergov harakatlari olib borilmoqda.